އޭއައި – މުސްތަޤްބަލުގައި ވަޒީފާތައް ގެއްލިދާނެތަ؟!

ލިޔުނީ : އިބްރާހީމް ޝަހީމް

އާޓިފިޝަލް އިންޓެލިޖެންސްގެ ހަލުވި ކުރިއެރުމާ ގުޅިގެން، އިންސާނީ މަސައްކަތުގެ މުސްތަޤުބަލާމެދު ފުޅާ ދާއިރާއެއްގައި މަޝްވަރާކުރެވި، އެކަމާއި ގުޅޭ ގޮތުން މިހާރު ވަރަށް ބޮޑަށް ޚިޔާލު ބަދަލުކުރެވެމުންދެއެވެ. އުފެއްދުންތެރި މަސައްކަތްތައް ހިމެނޭ ގޮތަށް، ގިނަ ދާއިރާތަކެއް އޮޓޮމޭޓެޑް ނިޒާމުތަކުން ބެލެހެއްޓޭނެކަމުގެ ތަސައްވުރަކީ، އާންމުންގެ މެދުގައި ކަންބޮޑުވުން އުފައްދައި، ސަމާލުކަން ލިބެމުންދާ މައުޟޫއެކެވެ.
އާޓިފިޝަލް އިންޓެލިޖެންސްގެ ސަބަބުން ވަޒީފާގެ ދާއިރާއަށް އަންނާނެ ބޮޑެތި ބަދަލުތަކަކީ ޔަޤީން ކަމެކެވެ. ނަމަވެސް، ހުރިހާ ވަޒީފާއެއް އެއްކޮށް ނެތިގެންދާނެކަމަށް ދެކުމަކީ ޙަޤީޤަތާ އެއްގޮތް ނުވާނެ ކަމެކެވެ. މިކަމަށް ފުންކޮށް ވިސްނާލާއިރު، އާޓިފިޝަލް އިންޓެލިޖެންސްގެ ސަބަބުން މަސައްކަތުގެ ބާވަތްތަކަށް ބަދަލު އަންނާނެކަމަށް ލަފާކުރެވެއެވެ. އެގޮތުން، ބައެއް ވަޒީފާތައް ނެތިގެންދިޔަ ނަމަވެސް، އޭގެ ބަދަލުގައި އައު ފުރުޞަތުތަކެއް ހުޅުވިގެންދާނެކަން ފާހަގަކުރެވެއެވެ.
ވަޒީފާތަކުގެ މުސްތަޤުބަލާ މެދު ކަންބޮޑުވުން ފާޅުކުރާ ފަރާތްތަކުގެ ވިސްނުމަކީ ތާރީޚީ ހަޤީޤަތްތަކާއި މިހާރުގެ ޓެކްނޮލޮޖީގެ ކުރިއެރުންތަކަށް ބިނާކޮށްފައިވާ އެކަށީގެންވާ ވިސްނުމެކެވެ. އާޓިފިޝަލް އިންޓެލިޖެންސް (އޭއައި) އަކީ ޖިސްމާނީ އަދި ސިކުނޑީގެ މަސައްކަތްތައް ހިމެނޭ ގޮތަށް، ގިނަ ދާއިރާތަކެއްގައި ތަކުރާރުކޮށް ކުރެވޭ އާންމު މަސައްކަތްތައް އޮޓޮމޭޓްކުރުމުގެ ޤާބިލުކަން ލިބިފައިވާ ޓެކްނޮލޮޖީއެކެވެ.
މި ޓެކްނޮލޮޖީގެ ސަބަބުން އެންމެ ބޮޑަށް އަސަރުކުރާނެ ކަމަށް ބެލެވޭ ދާއިރާތަކުގެ ތެރޭގައި ޑޭޓާ އެންޓްރީ، ޗެޓްބޮޓް މެދުވެރިކޮށް ދެވޭ ކަސްޓަމަރ ސަރވިސް، އެސެމްބްލީ ލައިން އުފެއްދުންތެރިކަން، ރޭޑިއޮލޮޖީ އަދި ޤާނޫނީ ލިޔެކިޔުންތައް މުރާޖަޢާކުރުން ފަދަ ދާއިރާތައް ހިމެނެއެވެ. މިއީ ކުރީގެ ސިނާޢީ އިންޤިލާބުތަކުގައި ޓެކްނޮލޮޖީގެ ސަބަބުން ބައެއް ވަޒީފާތައް ނެތިގެން ދިޔަ ގޮތާ އެއްފަދަ ޙާލަތެކެވެ.
ނަމަވެސް، މިހާރުގެ ކަންބޮޑުވުމަކީ އޭއައިގެ ފުޅާ ދާއިރާގެ ޤާބިލުކަމުގެ ސަބަބުން، މި ފަހަރުގެ އޮޓޮމޭޝަންގެ ބަދަލުތައް އިޤްތިޞާދުގެ މާ ފުޅާ ދާއިރާއަކަށް އަސަރުކޮށްފާނެ ކަމަށެވެ. މީގެ ތެރޭގައި ޓްރަކު ޑްރައިވަރުންނާއި މެދު ފަންތީގެ އެނަލިސްޓުން ފަދަ ވަޒީފާތައްވެސް ހިމެނެއެވެ. އަދި މި ބަދަލުތައް އަންނަ ސްޕީޑަކީ އާ ވަޒީފާތައް އުފެދޭ މިންވަރަށްވުރެ މާ ބާރު ސްޕީޑެއްގައި ކަމަށް ބެލެވެއެވެ.
މި ބަދަލުތަކާ ކުރިމަތިލުމަށްޓަކައި، މުޖުތަމަޢުގެ އެކި ފަންތީގެ ފަރާތްތަކުން އަވަސް ފިޔަވަޅުތަކެއް އެޅުމަކީ މުހިންމު ކަމެކެވެ. މީގެ ތެރޭގައި ތަޢުލީމީ ނިޒާމު އަލުން ބައްޓަންކުރުމާއި، މުވައްޒަފުންގެ ހުނަރު ތަރައްޤީކުރުމުގެ ޕްރޮގްރާމްތައް ހިންގުމާއި، އަދި އޭއައިގެ ސަބަބުން ކުރިމަތިވެދާނެ އިޖްތިމާޢީ އަދި އިޤްތިޞާދީ ގޮންޖެހުންތަކަށް ތައްޔާރުވުމަށް ސިޔާސަތުތައް އެކުލަވާލުން ހިމެނެއެވެ. މިގޮތުން، އޭއައިގެ ކުރިއެރުންތަކާއެކު ވަޒީފާގެ ބާޒާރު ބަދަލުވަމުންދާއިރު، އެ ބަދަލުތަކާ އެއްގޮތަށް މުޖުތަމަޢު ތައްޔާރުކުރުމަކީ ކޮންމެހެން ކުރަންޖެހޭ ކަމެކެވެ.
                   
ތާރީޚީ ހެކިތަކުން ދައްކުވައިދެނީ، ޓެކްނޮލޮޖީއަކީ ވަކި ވަޒީފާތަކެއް ނިމުމަކަށް ގެނެސްފައިވީ ނަމަވެސް، ޖުމްލަ ގޮތެއްގައި ވަޒީފާގެ ފުރުޞަތުތައް އިތުރުކުރާ ވަސީލަތެއްކަމެވެ. މިސާލަކަށް، ޕަރސަނަލް ކޮމްޕިއުޓަރުގެ އާމްދަނީއާ ގުޅިގެން ޓައިޕިސްޓުންނާއި ލެޖަރ ކްލާކުންފަދަ ބައެއް ވަޒީފާތައް އުވިގެން ދިޔަ ނަމަވެސް، ސޮފްޓްވެއަރ ޑިވެލޮޕްމަންޓް، ޑިޖިޓަލް މާކެޓިންގ އަދި ޑޭޓާ އެނަލިޓިކްސްގެ ދާއިރާއިން ގުނަ އަދަދެއްގެ އައު ވަޒީފާތައް އުފެދިގެން ދިޔައެވެ.
އާޓިފިޝަލް އިންޓެލިޖެންސް (އޭއައި) ގެ ކުރިއެރުންތަކުން ވެސް މިފަދަ ނަމޫނާއެއް ދައްކުވައިދޭނެކަމަށް ލަފާކުރެވެއެވެ. އޭގެ ސަބަބުން، އައު އަދި އިންޤިލާބީ ވަޒީފާގެ ގިންތިތަކަށް ޑިމާންޑް އުފެދޭނެކަމަށް ބެލެވެއެވެ. މީގެ ތެރޭގައި އޭއައި އެތިސިސްޓުން، ޕްރޮމްޕްޓް އިންޖިނިއަރުން، އޮޓޮމޭޝަން ސްޕެޝަލިސްޓުން، އަދި އިންސާނުންނާއި މެޝިންތަކުގެ މެދުގައި އޮންނަ ގުޅުން ބަލަހައްޓާ މެނޭޖަރުން ފަދަ މަޤާމުތައް ހިމެނެއެވެ.
މީގެ އިތުރުން، އޭއައި އިން އިންސާނުންގެ ޤާބިލުކަން މުޅިން ބަދަލުކޮށްލުމުގެ ބަދަލުގައި، އެ ޤާބިލުކަން އިތުރުކޮށްދޭނެކަމަށް ބެލެވެއެވެ. މިސާލަކަށް، ޑޮކްޓަރުންނަށް ބަލި ދެނެގަތުމުގައި އިތުރު ފުރިހަމަކަމެއް ގެނެސްދީ، އިންޖިނިއަރުންނަށް ޑިޒައިން ކުރުމުގައި އިތުރު ހަލުވިކަމެއް ގެނެސްދީ، އަދި ފަންނާނުންނަށް އިތުރު އުފެއްދުންތެރިކަމެއް ގެނެސްދޭނެކަމަށް ލަފާކުރެވެއެވެ.
މި ބަދަލުތަކާއެކު، މުޖުތަމަޢުތަކުން އައު ޓެކްނޮލޮޖީތަކަށް ހޭނުމާއި، އައު ހުނަރުތައް ދަސްކުރުމާއި، އަދި ދެމެހެއްޓެނިވި ގޮތެއްގައި އިޤްތިޞާދީ ކުރިއެރުން ހޯދުމަށް މަސައްކަތްކުރުމަކީ މުހިންމު ކަމެކެވެ. މިގޮތުން، ތަޢުލީމީ ނިޒާމުތަކާއި، ވަޒީފާގެ ތަމްރީނު ޕްރޮގްރާމްތަކާއި، އަދި ސަރުކާރުގެ ސިޔާސަތުތައް މި އައު ޙަޤީޤަތްތަކާ އެއްގޮތަށް ބައްޓަންކުރުމަކީ ކޮންމެހެން ކުރަންޖެހޭ ކަމެކެވެ.
މިހާރު ކުރިމަތިވެފައިވާ އެންމެ ބޮޑު ގޮންޖެހުމަކީ ވަޒީފާގެ މައިދާނުގައި ގިނަ އަދަދެއްގެ މީހުން ވަޒީފާ ގެއްލުމެއް ނޫނެވެ. އޭގެ ބަދަލުގައި، މިއީ ގިނަ އަދަދެއްގެ މަސައްކަތްތެރިން އެއް ދާއިރާއިން އަނެއް ދާއިރާއަށް ބަދަލުވަމުންދާ މަރުޙަލާއެކެވެ. މި ދަނޑިވަޅުގައި އެންމެ ބޮޑު ނުރައްކަލަކީ ހުނަރުގެ ފަރަގު ފުޅާވެގެން ދިއުމެވެ. އެއީ، މަސްނޫޢީ ޒަކާ (އޭއައި) ގެ އެހީތެރިކަން ލިބޭ އިޤްތިޞާދެއްގައި ކުރިއަށް ދިއުމަށް ބޭނުންވާ ތަމްރީނާއި ހުނަރު މަސައްކަތްތެރިންނަށް ލިބިފައި ނެތުމެވެ. ކުރިމަގުގެ ވަޒީފާތަކުގައި އިސްކަންދެވޭނީ މަސްނޫޢީ ޒަކާއަށް ފަސޭހައިން ނަކަލު ނުކުރެވޭނެ، އިންސާނުންގެ ޚާއްޞަ ސިފަތަކަށެވެ. މީގެ ތެރޭގައި ފާޑުކިޔުމުގެ ޤާބިލުކަމާއި، އުފެއްދުންތެރިކަމާއި، ޖަޒުބާތީ އިންޓެލިޖެންސް، އަދި ސްޓްރެޓެޖިކް މެނޭޖްމަންޓްގެ ހުނަރުތައް ހިމެނެއެވެ.
 
ނިންމާލުމުގެ ގޮތުން ދަންނަވާނީ، އާޓިފިޝަލް އިންޓެލިޖެންސް (އޭއައި) އަކީ އަޅުގަނޑުމެންގެ ވަޒީފާތައް ފޭރިގަންނާނެ ބާރެއް ނޫނެވެ. އެހެނަސް، އޭގެ ސަބަބުން އަޅުގަނޑުމެންގެ މަސައްކަތުގެ ބާވަތަށް އަންނާނެ ބަދަލުތަކަށް ތައްޔާރުވާން ޖެހެއެވެ. އޭއައި އަކީ ވަކިވަކި މަސައްކަތްތައް އޮޓޮމޭޓްކުރުމަށް ބޭނުންކުރެވޭ ހަރުދަނާ ވަސީލަތެކެވެ. ނަމަވެސް، އިންސާނުންގެ ޖުމްލަ ޤާބިލުކަމަކީ އޮޓޮމޭޓްކުރެވޭނެ އެއްޗެއް ނޫނެވެ. މުސްތަޤުބަލުގެ މަސައްކަތުގެ މާޙައުލަކީ އިންސާނީ ހުނަރުވެރިކަމާއި މެޝިންތަކުގެ ޓެކްނޮލޮޖީ އެއްކޮށްލައިގެން މަސައްކަތްކުރާ ތަނަކަށް ވުމުގެ ފުރުޞަތު ބޮޑެވެ.
މިހާރު އުފެދޭ މުހިންމު ސުވާލަކީ ވަޒީފާތައް ދެމިހުންނާނެތޯ ނޫނެވެ. އޭގެ ބަދަލުގައި، މުޖުތަމަޢުގެ ގޮތުގައި، އަޅުގަނޑުމެންނަށް މި ބަދަލަށް ތައްޔާރުވެ، އައު ހުނަރުތައް ދަސްކޮށް، މި ބަދަލާއެކު ކުރިއަރައިދެވޭނެތޯއެވެ. އަދި އޭއައިގެ މަންފާތައް ހަމަހަމަކަމާއެކު ބެހިގެންދާނެ ގޮތަކަށް ކަންކަން ރޭވިދާނެތޯއެވެ. މިގޮތުން، ކުރިއަށް އޮތް މަސައްކަތުގެ މާޙައުލަކީ މިހާރަށްވުރެ އުފެއްދުންތެރި، އަދި އިންސާނީ ޤަދަރަށް އިތުރު އަހައްމިއްޔަތުކަމެއް ދޭ ތަނަކަށް ހެދުމުގެ ފުރުޞަތު އެބައޮތެވެ.